ایک خادمہ... جس کی خوشبو جنت میں مہک رہی ہے.

حضرت ابن عباس رضی اللہ عنہما فرماتے ہیں کہ رسول اللہ صلی اللہ علیہ وسلم نے فرمایا: معراج کی رات میں نے ایک بہت ہی خوشبو دار جگہ دیکھی۔ میں نے جبرائیل علیہ السلام سے پوچھا: یہ خوشبو کہاں سے آ رہی ہے؟ انہوں نے بتایا کہ یہ خوشبو فرعون کی بیٹی کی خادمہ اور اس کے بچوں کی ہے۔ یہ خادمہ فرعون کی بیٹی کے بال سنوارتی تھی۔ ایک دن کنگھا اس کے ہاتھ سے گر گیا تو اس نے کہا: "بسم اللہ"۔ فرعون کی بیٹی نے حیرت سے پوچھا: کیا تم میرے ابا کو خدا مانتی ہو؟ خادمہ نے جواب دیا: نہیں، میرا رب، تمہارا رب اور تمہارے باپ کا رب اللہ ہے۔ فرعون کی بیٹی نے یہ بات اپنے باپ کو بتا دی۔ فرعون نے خادمہ کو بلا کر پوچھا: کیا میرے سوا تمہارا کوئی اور رب ہے؟ اس نے کہا: ہاں، میرا رب اللہ ہے۔ فرعون بہت غصے میں آیا اور ایک پیتل کی گائے منگوائی، اس میں پانی بھر کر خوب گرم کیا۔ پھر خادمہ کے بچوں کو ایک ایک کر کے اس میں ڈالنے لگا۔ جب اس کا شیرخوار بچہ باقی رہ گیا، تو ماں کا دل بھر آیا۔ لیکن اللہ کے حکم سے بچے نے بول کر کہا: "اماں! مجھے بھی ڈال دو، دنیا کا عذاب آخرت کے عذاب سے ہلکا ہے۔" خادمہ نے اللہ پر قربان ہونے کو قبول کر لیا، اور اس کی اور اس کے بچوں کی قربانی کی خوشبو جنت میں بھی محسوس ہوتی ہے۔